..:..الـفـلـسـطـيـنــي ..:.. !!

فلسطيني ممنوع تعيش
قالولك اسكت ماتحكيش
انت خلقت للتلطيش
للحواجز للمعابر للتفتيش
كتبوا علي جبينك ينداس
من الضابط للشاويش
فلسطيني قالولك ممنوع تعيش
فلسطيني ممنوع تثور
مقهور و مش مسموح تكون
اياك تطالب بحقك
اوعك بيوم تشوف النور
***
ممنوع تجدد هوية
ممنوع تجدد بسبور
فلسطيني و بدك تتعلم
هاي الشغله ضد الدستور
فلسطيني لازم تتألم
من دون ما يشوفك دكتور
فلسطيني ممنوع تتكلم
و لا يطلع بجناحك ريش
فلسطيني ممنوع تعيش
***
فلسطيني بكل المطارات
اسمك بالأحمر مكتوب
و على شباك مصلحة الجوازات
كتبوا علي جبينك مطلوب
لازم تتوقف ساعات
مذنب او من دون ذنوب
و يتوجه الك اتهامات
انك سبب كل الحروب
كأنو بسببك الحق مات
و العدل بارضك مسلوب
و كأنك سبب النكسات
و كل ازمات الشعوب
و كأنو بسببك مجرم فات
على جنين بلحظه الغروب
و دبح صبيان وبنات
و عجز على امرها مغلوب
***
مع انو الحقيقه
انا الي بالدنيا ضحية
عملتوني ماده للغنى
و قضية للي ما عندو قضية
انا الي راسي ما إنحنى بوجه
الريح القوية
انا الي شعبي صمد
في الضفه و بالرشيديه
انا الي شعبي انتفض
و بحجر حارب دوريه
و اليوم و بكره و للابد
عنا كلمه وحده هي
***
فلسطين عربيه
و راح تبقي عربية
عربية و راح ترجع